老人家 lou5 jan4 gaa1
老人家，男嘅叫［亞伯］、［公公］，女嘅叫［亞婆］、［老女人］，又有叫做［長者］、［老友記］；係指生命去到最後階段嘅人，喺舊時嘅一般定義係六十或者六十五歲以上，嗰陣通常已經退休，有得抱孫，而身體機能同健康狀況都會越嚟越差。而喺唔同嘅文化圈，對於老人家都有唔同嘅定義。由於呢樣嘢係一個漸變嘅過程，由壯年到老年嘅分界線通常都係好模糊嘅。有啲人認為做咗亞爺亞嫲就係做咗老人家，又有啲人認為退休先至係老人家嘅一個標誌。
世界衛生組織（WHO）同埋一啲西方國家對老人家嘅定義係到咗六十五歲以上嘅人。喺古代曾經將五十歲都定為係老人家，依家嘅政府就規定為六十歲以上。
老人家嘅特徵：一般嚟講，步入老年嘅人生理上會表現出新陳代謝放緩、抵抗力下降、生理機能下降等等嘅特徵。頭髮、眉毛、鬍鬚都會變白亦係老人家最明顯嘅特徵之一。
對待老人家嘅態度：依家嘅世界上各個文化圈都喺度提倡對於老人家嘅善待，中日韓等嘅東亞國家傳統上要求晚輩侍奉長輩，叫做（孝道）。另一方面，由古至今，人類亦會因為各種各樣嘅原因而歧視老人家，遺棄老人家，甚至虐待老人家，喺古時有啲民族甚至仲有（棄老）呢啲咁嘅習俗。
老人家嘅別稱：喺傳統上對於老年人嘅高齡都有啲褒義嘅稱謂。
《論語》為政：「吾十有五而志於學，三十而立，四十而不惑，五十而知天命，六十而耳順，七十而從心所欲」。
50歲：耆艾之年
耆艾：古時稱呼五十歲嘅人為（艾）。
《禮記》曲禮上：「五十曰艾。」
60歲：耆艾之年、耳順之年、花甲之年、下壽
耆艾：古時稱呼六十歲嘅人為（耆）。
耳順：《論語》為政：「六十而耳順」。
花甲：天干地支配合用來紀年，天干有十，地支十二。
從甲子起，六十年成一周，因此稱六十歲為花甲。
下壽：古人以六十歲為（下壽）。
61歲：還曆
還曆：古人以六十一歲為（還曆壽）。
由於按照干支紀年法，六十年為一輪。
六十一歲正係新一輪重新計算嘅時候，所以稱做「還曆」。
70歲：耄耋之年、從心之年、古稀之年、懸車之年、杖圍之年、中壽
耄耋：古時稱呼七十歲嘅人為（耄）。
《鹽鐵論》孝養：「七十曰耄。」
從心：《論語》為政：「七十而從心所欲」。
古稀：杜甫有《曲江》：「酒債尋常行處有，人生七十古來稀。」
懸車：古人一般去到七十歲辭官家居，廢車不用。
杖圍：古人到七十歲稱號（杖圍之年）。
中壽：古人以七十為（中壽）。
75歲：耆英
呢個本來係好意，形容七十五歲以上嘅長者，但後來俾電視劇入面嘅角色醜化咗，變成侮辱老人家嘅稱呼，因此（耆英）呢個詞依家喺廣東文化（尤其係香港）已經比較少用喺一般老人身上。
77歲：喜壽
喜壽：古人以七十七歲為（喜壽）。
因為草書「喜」字似七十七，故特代指七十七歲。
80歲：耄耋之年、朝枚之年、朝枝之年、杖朝之年、傘壽
耄耋：古時稱呼八十九十歲嘅人為（耋）。
《爾雅》釋言：「八十為耋。」
《毛傳》：「耋，老也，八十曰耋。」
朝枚：指八九十歲。
朝枝：指八九十歲。
杖朝：代指八十歲。
傘壽：古人以七十七歲為（傘壽）。
個「傘」字嘅草書體好似「八十」，所以稱做「傘壽」。
88歲：米壽
米壽：古人以八十八歲為（米壽）。
個「米」字拆開之後好似「八十八」，借指八十八歲。
90歲：耄耋之年、上壽
耄耋：古時稱呼八十九十歲嘅人為（耋）。
《禮記》曲禮：「八十九十曰耋。」
上壽：古人以九十歲為（上壽）。
99歲：白壽
白壽：古人以九十九歲為（白壽）。
因為（一百）少一為（九十九），借指九十九歲。
100歲：高壽、期頤
高壽：古人以一百歲為（高壽）。
期頤：古時稱呼一百歲嘅人為（期頤）。
《禮記》曲禮上：「百年曰期頤。」
鄭玄註：「期，猶要也；頤，養也。不知衣服食味，孝子要盡養道而已。」意思係：人至百歲，飲食、居住、行動等各方面都需要孝子照養，所以「百歲」稱做「期頤」。
108歲：茶壽
茶壽：古人以一百零八歲為（茶壽）。
因為個茶字上面係（廿），下面係（八十八）
兩個加埋就係（一百零八）歲。
無聊通識科。廣東話資料館
